Ein månad utan Alexander

Robin snakka litt om den tunge tida,  men mest snakka han om det som skal kome. Han og Alexander hadde store planar for framtida. Dei ville gi noko tilbake av alt dei syntest dei hadde fått gjennom symjinga og møtet med toppidretten. Og sjølv om Alexander ikkje skulle få oppleve dette, tenkjer Robin å gjennomføre planane gjennom organisasjonen The Dale Oen Experience. 

– Vi har fått utruleg mykje støtte til minnefondet etter Alexander. Særleg har ungdommar støtta opp ved å gi pengar, mange har gitt av konfirmasjonspengane. Ein gut selde krabbe langs vegen og gav av inntekta si, fortalte Robin.

Han takka også for all varme og støtte familien har fått i denne tunge tida, både frå fjern og nær.

– Naboane viste ein utruleg omtanke gjennom heilt kvardagslege ting, slik som å lage mat til oss, fortalte Robin.

Han sa også at det gjorde godt midt i sorga å sjå dei fine reportasjane om Alexander og lese alt det gode som vart skrive om veslebroren hans.