Døscherholmen inn i ny tid

DØSCHERHOLMEN: – Dette blir bygg som representerer vår tid, seier ein av utbyggjarane, Bjørn Arthur Kleppe, som sjølv bur på Døscherholmen.

Tenkte tradisjonelt først
Nord på Tofterøy i Sund, med utsikt vestover mot Glesnes, ligg Døscherholmen. Ein gong var holmen ein aktiv handelsstad med fiskemottak, trankokeri, post og butikk, men det er nokre år sidan no. Dei siste åra har to familiar jobba for å få godkjent ei utbygging av fritidsbustader på holmen. Etter fleire rundar med kulturavdelinga ved Hordaland fylkeskommune, blei reguleringsplanen endeleg godkjent i fjor.

– Vi hadde i utgangspunktet planar om å byggja alt i tradisjonell stil, men kultur- og idrettsavdelinga ved Hordaland fylkeskommune ønskte ikkje at det skulle byggjast tradisjonelle rorbuer her, seier Kleppe.

Gjennomtenkt utforming
Nyleg sendte arkitekt Rolv Eide AS inn skisser på dei nye bygga som skal førast opp på sørsida av holmen. Samtidig blir det søkt om såkalla rammeløyve og ansvarsrett, som må til før sjølve bygginga kan starta.

– Eg synest bygga blir steikande tøffe, smiler Kleppe.

Der nothengja står i dag, skal det førast opp tre bygg i tre etasjar – til saman ni einingar. Det gamle trankokeriet som i dag står utan tak, skal erstattast med to nye fritidsbygg. Det blir mogleg å gå mellom bygga.  På innsida av holmen er det planlagt felles uteområde med kai og båtplassar i flytebryggjer.

Kjøken og opphaldsrom er plasserte mot sør og vest i bygga.

– Dette vil gi leilegheitene gode lys- og solforhold, skriv arkitekten.

I fasadane mot aust blir det derimot minimalt med vindaugo, slik at uteplassen ved kaien blir mest mogleg usjenert.

Til politisk behandling
Saksbehandlar Sigrid Midttveit i Sund kommune fortel at søknaden nok kjem til politisk behandling i planutvalet, sjølv om administrasjonen teknisk sett har høve til å godkjenna søknaden på eiga hand.

– Det har vore mykje diskusjon om desse planane. Er det bygg som kolliderer med det vi har frå før i kommunen, må politikarane få lov til å meina noko om det, meiner Midttveit.

Bjørn Arthur Kleppe ser ikkje bort frå at det kan bli murring og diskusjon om utsjånaden på bygga.

– Murring blir det om alt her i landet. Men vi lever i 2010, og det må vera rom for litt nytenking. dette blir eit anlegg som vil vera noko eige i kommunen, meiner Kleppe.

– No er det også slik at fylkeskommunen har forlanga noko moderne. Vi følgjer den godkjente reguleringsplanen, som er utarbeidd i nært samarbeid med fylkeskommunen, seier Kleppe.

Han håpar grunnarbeida kan ta til i haust og reknar med at byggeperioden vil vara i eitt til haltvanna år.

– Prosessen har tatt lang tid. Men slik det no blir, har det vore verd å venta på. Vi er mykje meir nøgde med denne utforminga enn den vi starta med, understrekar Bjørn Arthur Kleppe.

(Fotomontasje: Arkitekt Rolv Eide AS)