- Det dei gjer i Øygarden er svært interessant

Barne-, likestillings- og inkluderingsminister Audun Lysbakken (SV) vitja Øygarden tysdag føremiddag. Der fekk han møta både ordførar og ei gruppe tilsette i Familiens hus.

Inspirert

– Eg vert absolutt inspirert av å møta dei tilsette i Familiens hus, for å få høyra kva dei har gjort her ute, seier Audun Lysbakken til Vestnytt.

Møtet vart amputert på grunn av oske frå Island, men ministeren nytta tida maksimalt då Øygarden kommune presenterte si samanslåing av PPT-tenesta, barnevernet, helsestasjonen, avdelinga for psykisk helse og familiesenteret, med helsestasjonen i hovedsetet.

Regionalt samarbeid

Ordførar Olav Martin Vik (TVØ) innleia det korte møtet med å fortelja om det regionale samarbeidet mellom Askøy, Fjell, Sund og Øygarden med sine nær 60.000 innbyggjarar.

– Me er i forkant av samarbeidsreformen, sa ordføraren til Audun Lysbakken.

Han la til at kommunane trengte tre element frå regjeringa i høve til regionalt samarbeid; pengar, delaktigheit og friheit.

Pionérarbeid

Så var det Anna Nesje Nes frå Familiens hus sin tur. Det dyktige familieoverhovudet har vorte ein av dei viktigaste medspelarane i Familiens hus sin suksess, takka være kommunalsjef Åse Vik.

– Om nokon skal få kreditt for at Familiens hus er blitt ein suksess, så er det kommunalsjef Åse Vik. Ho har stått i bresjen for dette prosjektet frå byrjinga. Det har gitt resultat. Både Vik og dei tilsette har arbeidd systematisk for dette, seier ein stolt rådmann Torgeir Sæter.

Stolt var Audun Lysbakken óg.

Han ba om ordet fleire gonger og spurte inngåande om fleire av ordningane som vert gjennomført i Familiens hus. Blant anna er barneministeren opptatt av å fanga opp borna før det er for seint, og sørga for at dei ikkje vert kasteballar i systemet.

– Der kjem Familiens hus inn. Ei slik ordning kan forhindra at born vert kasteballar i systemet, seier Lysbakken.

– Familiens hus finst no fleire stader i Noreg, men i all hovudsak i små kommunar. Passar ordninga i både store og små kommunar?

– Det er ikkje sikkert. Forskjellige kommunar krev forskjellige løysingar, seier Audun Lysbakken til Vestnytt.

– Godt skussmål

Torgeir Sæter tek ministerbesøket som ein dokumentasjon på at Øygarden har tatt dei rette grepa kring arbeidet med born og unge.

– At statsråden kjem for å få veta meir om Familiens hus i Øygarden, er ein klapp på skuldra til Øygarden og eit prov på at me faktisk er leiande i dette arbeidet. Det har me óg merka på rekrutteringa av fagfolk. Når me har ledige stillingar, har me god innsøkning fordi me har eit godt ord på oss, seier Torgeir Sæter.

Rådmannen tykkjer det er svært positivt at Audun Lysbakken kjem til kommunen for å hausta erfaringar han vil bruka i sitt arbeid som minister.

Rett til Fjell

Etter presentasjonen i Øygarden bar turen rett til rådhuset i Fjell der han ville snakka om prosjektet «Betre saman for barna». Ordførar i Fjell, Eli Berland (H), kunne ønska statsråden velkomen til rådhuset der han fekk informasjon om samhandlingsprosjektet mellom Askøy, Fjell, Sund og Øygarden.

– Eg er spent på å få høyra meir om dette prosjektet, sa ein roleg og fri for oske-stress minister til Vestnytt før han vart køyrt sørover mot Fjell.