Dei lagar Noregs beste røykelaks

I produksjonshallane i Porsvika i Sund luktar det røykt, og vakumerinspakkinga av ferdig preparert laks går på høggir. Blant eit trettitals kvinnelege arbeidarar står dagleg leiar Kjell Inge Eide (52) og smiler ekstra breitt – torsdag vann Sotra fiskeindustri førstepris for sin kaldrøyka laks. I konkurranse med 34 andre lakseprodusentar var det laksen frå heilt sør på Sotra som fekk den høgaste utmerkinga av fagdommarane på den anerkjente Aqua Nor-fiskerimessa i Trondheim.

– Vi er stolte. Og eg tenkjer sjølvsagt at dette er stort for ei verksemd som oss. Men det er ikkje eg som har vunne denne prisen åleine, det har vi alle gjort saman, seier Eide.

Må utvide kapasiteten

Nesten 20.000 tonn fersk laks blir pakka og forsvinn i containerar ut frå Sotra fiskeindustri i Porsvika kvart år. 4000 tonn blir filitert, og nesten 1400 tonn røykt før det blir sendt ut på marknaden. Men dette er langt frå nok til å dekke etterspørselen, og produksjonen skal no aukast. Når nye tørkeomnar er på plass, vil kapasiteten bli auka med nær 50 prosent, og det vert mogleg å produsere opptil 10 tonn røykelaks på kvart åttetimars skift.

Kjell Inge Eide er klar på at gull i det som blir rekna som noregsmeisterskapen i lakseforedling, vil gjere produkta frå Porsvika endå meir ettertrakta.

– Vi slit med å klare ordrane og må utvide kapasiteten. Alle aktørane i bransjen legg merke til kven som vinn desse kåringane. Utfordringa vår blir no å bruke denne sigeren riktig i marknadsføringa av fisken vår, seier Eide.

Får ikkje bygge ut

70 produsent av laksen frå Sotra fiskeindustri går til eksport, og det er spesielt Italia som er blitt den viktigaste marknaden. Røykelaks frå Porsvika er no å finne i åtte italienske supermarknader, og i år skal det også fraktast nær 300 tonn laks til Australia. Eide jobbar også med å få innpass hos fleire daglegvareverksemder i Noreg, i dag får ein kjøpt fisk frå Sotra fiskeindustri hos Rema 1000 i Sør-Noreg og hos Coop-kjeden.

Nivået på produkta som deltok i konkurransen, var svært høg, opplyser fagsjef Svein Reppe i Norsk sjømatbedrifters landsforening. I tillegg til pris for beste kaldrøyka laks vart det delt ut prisar i tre andre klassar: Varmrøyka laks, gravlaks og open klasse.

– Rekordmange verksemder deltok i år, og det har ikkje vore lett å nå til topps. Dei som har vunne sine kategoriar, kan med rette kalle seg noregsmeistrar, sier Reppe.

Om Sotra fiskeindustri får det som dei vil, blir det betrakteleg meir aktivitet i Porsvika dei komande åra. Nye produksjonsbygg er teikna, og Eide ventar berre på klarsignal frå politikarane. Fylkesmannen har sett ned foten to gongar for utviding i retning sørover for eksisterande bygg.

– Filetavdelingen utvida vi i fjor. Men vi treng meir plass, seier Eide.

Fakta Sotra fiskeindustri

Fiskeverksemd i Porsvika i Sund kommune. Produserer rundt 25.000 tonn fersk og røykt laks kvart år.

Omsetjing på 267 millioner kroner i 2010. Resultat etter skatt på 768.000 kroner.

Rundt 150 tilsette. Grunnleggjar, medeigar og dagleg leiar er Kjell Inge Eide.

Sotra fiskeindustri vart kåra til årets verksemd i Sund, Fjell og Øygarden av Vest Næringsråd, DNB Nor, Nordea og Sparebanken Vest i 2009.

Vinnarar i NM i røykt og grava laks 2011

Open klasse: Gjendemsjø fisk AS, Brattvåg, Møre og Romsdal

Varmrøykt laks:  Mikals laks AS, Skiftun, Rogaland

Gravet laks: Br. Remø AS, Sula, Møre og Romsdal

Kaldrøykt laks: Sotra fiskeindustri, Sund, Hordaland