- Gje ungdom ein bilbane i Øygarden

Vestnytt møter Lene Herdlevær frå Øygarden utanfor Sotra vidaregåande skule. Her skal ho læra seg verkstadsarbeid. Skulevalet syner at 17-åringen med eigen bil er over gjennomsnittet interessert i bil og mekking.

– Eg er svært interessert i bil, seier Lene Herdlevær.

Reagerer på varsling

Ho reagerer positivt på ordførar Olav Martin Vik si varsling til politiet om høgt fartsnivå på Øygards-vegane, men tykkjer samstundes å nytta høvet til å arbeida for ein bilbane for bilinteressert ungdom.

– Dei som interesserer seg for bil og køyring, må nytta vegane i kommunen til å køyra på, fordi dei ikkje har eit alternativ. Dei fleste av oss køyrer veldig fint, men det er alltid nokon som held høg fart, seier Herdlevær ærleg.

Ho ønsker at kommunen skal ta initiativ til ein bilbane.

Facebook-gruppe

17-åringen kan ikkje køyra bil sjølv enno, men ventar på at ho skal få ta lappen. Då får ho nytta Saaben ho eig og fiksar på.

No har ho laga ei facebook-gruppe for å synleggjera kor mange som er interessert i bil i Øygarden.

– Me tel 232 medlemmer i dag, og dei fleste er frå Øygarden.

Jan Åge Dale har i fleire år engasjert seg for ungdomsarbeid i kommunen, og då særskilt for ungdom med motorinteresse. Han trur over 50 ungdommar har høg interesse for mekking i Øygarden.

– Det er i alle høve så mange, seier Dale.

– Vår gjeng likar å køyra fort, men dei kunne tenkt å gjera dette i lovlege og sikre omgjevnader, seier Lene Herdlevær.

Det høyrer med til historia at den største fartssyndaren i Øygarden kommune er pendlaren.

Stor interesse

Herdlevær trudde ikkje det var så stor interesse for bil i Øygarden før ho oppretta gruppa på nettet.

– Ein bane hadde gjort utruleg mykje for heile regionen. Det er berre ein bane på Vestlandet, og den ligg på Eikås, seier 17-åringen.

Ho legg til at Bergen gatebilklubb er svært interessert i å hjelpa Lene Herdlevær og hennar vennegjeng med å arbeida for ein bilbane i Øygarden.

Vanskelig, men spanande

Varaordførar Otto Harkestad tykkjer det virkar interessant at ungdommen i kommunen vil oppretta ein bilbane, men han trur det vert vanskeleg.

– Det krevst eldsjeler som arbeider fram ei slik sak. Eg trur det vert både dyrt og vanskeleg å få til, men eg stiller meg ikkje negativ til dette, seier Otto Harkestad ærleg.