Vellukka satsing

Øygarden er ikkje einaste kommunen i landet som har problem med sjukdom. Statistikken viser at verksemder i det offentlege slit meir på dette feltet enn private verksemder. Årsakene er mange og samansette, men det viser seg at dei kommunane som tar tak i problemet, gjerne får raske resultat.

I Øygarden har dei gått grundig til verks. Dei har satsa på kvalitetskommuneprogrammet, eit program som staten, Kommunenes Sentralforbund og arbeidstaker­organisasjonene står bak. Visjonen er mellom anna at kommunane skal vere ein god arbeidsplass for alle tilsette, i tillegg til å gi tenester av høg kvalitet. Gjennom regelsmessige møte og samtalar med alle partane, har ein greidd å betre samarbeidsklima og arbeidsmiljø. Det var tydelegvis det som skulle til.

Johannes Mikkelsen, som har vore ansvarleg for gjennomføringa av programmet, er realistisk og peikar på at sjukefråver kan svinga mykje. I ein liten kommune som Øygarden kan sjukdom hos nokre få arbeidstakarar vise godt igjen på statistikken. Han peikar også på at arbeid for ein god bedriftskultur ikkje er eit arbeid som nokon gong blir ferdig. Det må jobbast med kontinuerleg. Men uansett kor mykje ein jobbar for å få ned sjukefråveret, vil enkelte yrke ha høgare fråver enn andre. Og kommunane, med tunge pleie- og omsorgsoppgåver, har mange tilsette i desse yrkene.