Vel utført oppdrag

Etter å ha vore primus motor i pakkegjengen gjennom mange år, vart Anna Martinussen med på ein tur til Romania i 2003. Ein del av opplegget var omvisning på sjukehuset. Då Martinussen og dei andre frå pakkegjengen såg vaskeriet, vart dei så sjokkerte at dei straks tok affære. Sjukehuset i seg sjølv var ille nok, men vaskeriet greidde dei ikkje gløyme. Då dei kom heim, sette dei seg som mål å skaffe 250.000 kroner til nytt vaskeri. Dåverande ordførar Jan Utkilen kvitterte med å seie at for kvar krone pakkegjengen greidde å samle inn, skulle Fjell kommune gi ei krone. Innsatsen frå Fjell utløyste også andre midlar. Og då Tøy frå Øy-representantane kom til Pascani denne gongen, var sjukehuset som nytt. Dei kunne med sjølvsyn konstatere at innsatsen dei hadde lagt ned, hadde gitt resultat langt utover det dei hadde drøymt om.

I tillegg til innsatsen for sjukehuset, har pakkegjengen på Kårtveit sørga for gode, reine klede og julegåver til trengande i Romania. Primus motor i arbeidet har vore Anna Martinussen, og ho er blitt rettmessig heidra for dette arbeidet. Mellom anna har ho fått Kongens fortenestemedalje. Men ho hadde ikkje greidd arbeidet åleine. Saman med henne har 12 andre ivrige personar stått på, iherdig og jamnt og trutt gjennom 20 år. Det er ein mildt sagt ein imponerande innsats.