Utvikling på Ågotnes

Årsaka til den lange prosessen er ikkje at politikarane har vore i tvil om behovet for eit helsesenter i den nest største og  raskt veksande bygda i Fjell. Problemet har vore planar om ein ny vegtrase gjennom bygdesenteret. Så lenge det ikkje var gjort endeleg vedtak på kvar den nye vegen skulle gå, har dei folkevalde vore forsiktige med å tillate omfattande nybygging.

I teorien er dette heilt riktig prioritering. Mange bygde- og kommunesenter kunne sett heilt annleis ut om planane kom først og bygginga etterpå. Men det er ikkje alltid ting utviklar seg i ønskeleg kronologisk rekkefølgje. Vegbygging er ingen enkel faktor å ha oversikt over. Det er noko vi her i regionen etterkvart veit alt om. Dersom all utvikling skulle bli stoppa i påvente av vegplanar, hadde det ikkje skjedd mykje verken her eller andre stader i dette landet.

Gjeldande kommundelplan for Ågotnes vart utarbeidd før årtusenskiftet og den skulle gjelde frå 2000 til 2010. I botnen for planen var det utarbeidd ein stadanalyse med tilhøyrande vakre teikningar og visjonar. Så langt vi kan sjå, er det ikkje så mykje å spore av desse teikningane i dagens Ågotnes. Men noko er blitt nokonlunde som planlagt, nemleg utvikling av eit senter på eitt senterområde.

Blant dei mest etterlengta tilboda her, var eit helsehus.    No, i 2011, etter ein lang prosess står endeleg helsehuset ferdig. Her er også etablert butikkar og bustader i same området. Andre tilbod er på veg. Det er ingen tvil om at det er stor fart i utviklinga på Ågotnes. Det at utviklinga skjer utan ein overordna plan er sjølvsagt ikkje ideelt. Resultatet av å bygga først og planlegga etterpå ser ein på Straume. Utviklinga i dei to bygdene har vore svært ulik dei seinare åra. På Straume har ein endeleg planlagt ein heilskap, på Ågotnes har ein bygd ut. Det er å håpa at ein ikkje må til med den same planmessige ryddejobben på Ågotnes.