Usikkert samarbeid

Då fleirtalskoalisjonen Frp/Høgre/KrF kom til makta etter førre val, prioriterte Høgre å få ordføraren. Dette var det einaste vervet Høgre fekk. Frp fekk leiarvervet i to komitear i tillegg til varaordføraren, og KrF fekk leiarvervet i den siste komiteen. Då ordførar Lars Lie gjekk bort, stod koalisjonen att med to alternativ: Enten å henta ein annan ordførar frå Høgre, eller å reforhandla heile avtalen. Høgre valte å stå fast på at dei skulle ha ordføraren, og dermed fekk Fjell sin første kvinnelege ordførar i Eli Berland.

Berland har vore gruppeleiar for Høgre, og har lang politisk erfaring. Men det er ikkje ei enkel oppgåve å bli kasta inn i ordførarvervet så brått. Viktige saker som Sotrasambandet, ny storhamn for bergensområdet, vidareutvikling av Straume idrettspark og framtida for Straume sentrum er ting Berland må ta tak i midt i prosessane. I kommunestyremøtet der Berland vart ordførar, ba ho om støtte frå eit samla kommunestyre for å makta oppgåva. Men det er lite som tyder på at Fjell kommunestyre blir prega av harmoni og semje i perioden fram til kommunevalet hausten 2011.

Det har vore tidvis harde frontar mellom posisjon og opposisjon i Fjell-politikken. Og så langt har Eli Berland på ingen måte framstått som ein kompromissvillig politikar som samarbeider på tvers av partigrensene. Ho har snarare vore blant dei i fleirtalskoalisjonen som har stått hardast på frontane. Berland kan såleis ikkje automatisk venta seg støtte frå eit samla kommunestyre. Og delar av opposisjonen er skeptisk til om Berland vil klara å vera den samlande politikaren det ofte er forventa at ein ordførar skal vera. Men det er samstundes heilt på det reine at opposisjonspolitikarane hadde steila langt meir dersom varaordførar Georg Indrevik (Frp) hadde tatt steget opp og blitt ordførar. Av omsyn til dei 22.000 innbyggjarane Fjell kommunestyre skal jobba for, må ein håpa at politikarane klarar å finna felles grunn også utan den samlande figuren dei hadde i Lars Lie.