Ungdom med makt

Mange kommunar har fått uvanleg mange ungdommar inn i kommunestyra. Medan det tidlegare år gjerne har vore vanleg at ungdommar datt nedover på lista etter valet, har det denne gongen vore motsett. Det er ikkje utenkeleg at årsaka er at fleire ungdommar brukte røystesetelen i kommunevalet denne gongen. Tradisjonelt har dei yngste veljarane ikkje vore så engasjerte i det som skjer på kommuneplan. Barnehagar og skular, vegar og kloakk er ikkje det som er mest aktuelt i dei unge sin kvardag. 

I Fjell får to unge politikarar, ein frå Høgre og ein  frå Ap, tunge oppgåver å bryne seg på. 22-åringen Jan Arthur Nilssen (H) skal ta sete som komiteleiar for plan. 21-åringen Joakim Snekkevik Hevrøy (Ap) vart stemt inn til fast plass i formannskapet. Dette kan gi spennande erfaringar, både for ungdommane og for det politiske miljøet. Det er eit faktum at lange kommunestyremøte kan fortone seg som ei ørkenvandring. Det kan vere langt mellom både godbitar og saftige saker. Men arbeidet som vert langt ned, er av stor betydning for kvardagen til innbyggjarane i kommunen.

Mange av medlemmene i kommunestyre og komitear er garva lokalpolitikarar som kjenner systemet ut og inn. Det kan vere vanskeleg for nye å skjøne det som foregår og få fram sine tankar og meiningar. Ein kan håpe at eit kommunestyre med mange unge kan vere med å røske opp i gamle og uheldige herskarkulturar. Samstundes er det slik at innsikt og erfaring er viktig når lokalsamfunn skal byggjast.

Vi bur alle i kommunar. Arbeidet som blir gjort i kommunestyra, vedkjem oss alle. Derfor er det gledeleg når samansetninga etter eit val gir eit variert mannskap i kommunestyret, både når det gjeld alder og kjønn.