Uhaldbart taxirot

Fylkeskommunen har tildelt Norgestaxi oppdraget med å frakta skuleelevar som treng skyss, og som ikkje kan nytta skulebuss. Tidlegare var det Bergen Taxi som hadde denne køyringa. Og dei første skuledagane i Fjell har vore prega av rot og frustrasjonar for elevar som treng taxiskyss.

Kvar morgon i førre veke stod Mohamed Osman (6) opp, pakka sekken og gjorde seg klar til å gå på skulen. Men kvar einaste morgon blei han ståande og venta på ein drosje som ikkje kom. Mohamed går i mottaksklassen på Foldnes skule, ein klasse for elevar som nettopp har kome til Noreg, og dermed treng opplæring som er tilpassa deira situasjon. Det er 13 elevar i klassen, og heile ni av desse har blitt svikta av Norgestaxi – enten ved at dei har kome for seint på skulen, eller at dei ikkje har blitt henta i det heile tatt. Foldnes skule har vore i hyppig kontakt med taxiselskapet, og blitt lova spesiell oppfølging, utan at noko har skjedd.

At elevar ikkje kjem på skulen på grunn av rot med transporten, er ille nok i seg sjølv. At førsteklassingar ikkje kjem seg på skulen dei første skuledagane, er rett og slett tragisk. Ei stor hending og ein toneangjevande periode i livet deira vert på grunn av Norgestaxi prega av usikkerheit og rot. Det er uakseptabelt.

Norgestaxi hadde tidlegare pasientkøyringa for Helse Bergen, men mista denne kontrakten etter rot som liknar mykje på det elevane i Fjell no opplever. Mykje tyder på at taxiselskapet har for få bilar og sjåførar, for dårleg system og for dårleg kommunikasjon mellom leiing og sjåførar. Dersom ikkje Norgestaxi snarast får full orden på skulekøyringa, må konklusjonen vera at selskapet er kronisk upåliteleg. Og då bør selskapet neppe tildelast fleire offentlege kontraktar.