Tranevågen ungdomsskule

Då det vart kjent at Fjell ville bygge ein baseskule til ungdommane på vestsida, vart det mykje ståk. Både blant foreldre og lærarar var det mange som var skeptiske til ei slik løysing. Det er lett å forstå både med utgangspunkt i sunn fornuft og erfaringare som tidlegare er gjort med opne skular. Elevar i tenåra let seg lett distrahere, og skjer det mykje i landskapet, kan det by på problem å halde på konsentrasjonen.

Det er over 30 år sidan siste bølgje av opne skular gjekk over landet. Då gjekk ikkje mange år før dei fleste skulane vart utstyrt med vegger og vanlege klasserom. Sidan den tid har mykje endra seg. PC-bruk, internett og nye krav til skulen har ført til at undervisningskvardagen er ein heilt annan, og behovet for fleksible løysingar er stort. Ein skule med gammaldags romløysing ville ikkje vore funksjonell.

Tranevågen ungdomsskule er ikkje den einaste opne skulen i Fjell kommune. Liljevatnet skule har også ei open løysing. Det er dessutan ei rekkje andre skular i her i fylket og elles i landet med ulike typar opne løysingar. Og erfaringane er ulike, somme lovprisar nye løysingar, andre dømmer dei nord og ned. Mykje er avhengig av motivasjonen til rektor og lærarar.

Eitt er sikkert, og det er at Tranevågen ungdomsskule er lenge etterlengta. Plassproblema i skulane på vestsida vart drøfta i det vide og det breie før politikarane endeleg bestemte seg for å ta kostnadene med å byggje ein heilt ny skule for ungdomstrinnet. Det blir betre plass på skulane på  Ulveset og Ågotnes som no blir reine barneskular, og ungdomstrinnet får ein skule tilpassa sine behov. Vi ønskjer rektor, lærarar og elevar lukke til med ny skule og nye utfordringar.