Sund satsar på ungdom

På 90-talet blomstra ungdomskulturen i Sund. Rockeklubben, som fekk boltre seg i det gamle kommunehuset på Steinsland, var arnestad for mange nye rockegrupper og var ein samlingsstad for ungdom. Rockeklubben stod som arrangør for konsertar og kurs, og vart eit alternativt tilbod til ungdom som elles berre hadde idrett som fritidstilbod.

Då dette miljøet forsvann, var det mange ungdommar som vart rotlause og ikkje hadde noko konstruktivt å ta seg til i fritida. Dei siste 10 åra har det vore minimalt med tilrettelegging for ungdomsaktivitetar og andre tilbod utanom dei tradisjonelle til denne aldersgruppa.

Det er derfor gledeleg å leggje merke til at det den siste tida har kome i gang fleire tiltak. Rockeklubben er ferd med å starte opp igjen i nye lokale og med støtte frå kommunen. For første gong har Sund kosta på seg å tilby sommarjobb til ungdommar. Heile 400.000 kroner er sett av til dette formålet, og søknadene har strøymd på. Det er tydeleg at dette er eit populært tiltak.

Det nye ungdomskontoret som opnar til hausten, representerer endå eit viktig tilbod. Hit kan ungdommar kome og få svar på det meste av ting dei måtte lure på, om det gjeld utdanning, arbeid, helse eller økonomi. Kontoret tar også i mot foreldre.

Ungdommar i vår tid møter ei rekke utfordringar som ingen i deira aldersgruppe har møtt før, både på godt og vondt. Det er behov for gode tilbod og støttetiltak i nærmiljøet for å leggje grunnlaget for ei best mogleg framtid for alle. Med desse tiltaka er Sund igjen på offensiven når det gjeld ungdom. Det er frivillige krefter i kombinasjon med dyktige tilsette i kommunen som gjer at det no skjer mykje positivt på dette feltet i Sund.