Strammare reimar i Fjell

Fjell er på ingen måte ein fattig kommune. Økonomikontrollen virkar å vera god, og i motsetnad til mange andre kommunar har ein ikkje slite med store underskot. Det er dessutan lite som tyder på at ein har seriøse manglar i tenestetilbodet. Men alt kan alltid bli betre, og innbyggjarar vil ønskja seg betre trafikksikring, nye skulebygg og meir intensiv eldreomsorg. Desse ønska er det vanskeleg for politikarar å stå imot. Dei er valde inn for å forvalta innbyggjarane sine interesser, og sit i kommunestyret på innbyggjarane sin nåde. Dermed er det nærast standard både i Fjell og andre kommunar at politikarane plussar på rådmannen sitt budsjettforslag. Det finst alltid gode føremål som treng pengar.

I Fjell har ikkje politikarane sin gjevartrang fått dramatiske konsekvensar. Årsaka er todelt. For det første har Fjell kommune eit budsjett på langt over ein milliard kroner. Og då gjev ikkje nokre få millionar her og der dei heilt store utslaga i rekneskapen. For det andre har Fjell sparepengar, dei har kunna ta av kapitalfondet slik at budsjett i ubalanse brått kom i balanse. Difor har kommunen brukt meir pengar enn dei får inn, og i 2010 gjekk Fjell med 17 millionar kroner i underskot. No vil rådmannen stramma inn, og gjev klar melding om at ein ikkje kan halda fram slik. Fjell kuttar mellom anna stillingar tilsvarande 33 årsverk i jakten på ein meir bærekraftig økonomisk situasjon. Det er all grunn til å håpa på at politikarane tek signala frå rådmannen på alvor, og ikkje blir altfor gåvmilde i budsjettprosessen. At ein del innbyggjarar kjem til å bli skuffa, må heller politikarane læra seg å leva med.