Spleiselag

Kommunane som er med i BIR er ulike. Bergen skil seg ut som ein storby med spesielle utfordringar, store og tettbygde kommunar som Askøy og Os krev kanskje andre løysingar enn mindre og meir grisgrendte kommunar. Men skal samarbeidet fungere, må alle få tenester som er tilpassa busetnaden.

Når BIR ber kommunane vere med på eit spleiselag som skal gi Bergen betre avfallshandtering, er det ikkje meir enn rett og rimeleg at dei seier ja. Eit bossug som det Bergen treng, er ikkje særleg aktuelt verken i Skogsskiftet eller på Tofterøy. Då blir det patetisk når enkelte politikarar i Sund seier at dei ikkje vil vere med å betale dette gildet fordi eit slikt system aldri kjem til å bli bygd i Sund. Det er ikkje snakk om meir enn 150 kroner per innbyggjar i Sund i året. Likevel greidde eit fleirtal i formannskapet å stemme nei.

Ordførar Albrigt Sangolt er med rette flau på kommunen sine vegne. Han er redd at omdømmet til Sund kan bli skada av slike haldningar.

No skal saka vidare til kommunestyret. Håpet må vere at det der finst litt meir vidsyn og vilje til samarbeid enn det som finst i formannskapet.