Solidarisk jul

I Noreg har jula tradisjonelt vorte feira som det den er, ei kristen høgtid. At nissar har vore eit viktig innslag i feiringa, har ikkje tatt fokuset vekk frå at det er ei høgtid for djupe tankar og nestekjærleik. I moderne tid har den kristne bodskapen vorte mindre viktig for ein stor del av innbyggjarane i landet. Mange tilhøyrer andre religionar, og mange er ateistar. Men også for desse er jula gjerne ei tid der ein legg vekt på samvær med sine næraste, og viser at ein set pris på livet og andre menneske.

Jula er likevel også ei tid for kjøpefest. At ein brukar mykje pengar på mat er éin ting, men mange brukar også enorme summar på gåver. I vårt overflodssamfunn slit ein gjerne med å finna noko folk verkeleg treng, og for å løysa den floka endar ein kanskje opp med dyre luksusgåver som absolutt ikkje kan seiast å vera noko folk treng. Då kan det vera grunn til å minna om at det i verda vår er mange som langt frå har det dei treng. Sjølv i Noreg er det mange som manglar elementære ting, og i juletida blir det ekstra påtrengande – kanskje spesielt for foreldre som slit med å gje borna ei like gåverik jul som  andre får.

Heldigvis finst det motpolar til kjøpepress og pengegalopp. I Øygarden vert det for første gong arrangert alternativ jul, der rundt 30 menneske skal samlast for ei triveleg og nøktern feiring på Kvernepollen. Tilbodet er tenkt til alle som av ulike årsaker ikkje får i stand den store julefeiringa heime, eller som rett og slett har lyst til å ta del i eit godt fellesskap på julekvelden. I Fjell og Sund har Lions samla kjøpt inn øskjer med mat og snop, som gjennom Nav blir gjeve til folk som ikkje har så mykje å rutta med.

I ei tid der reklamar prøver å overtyda oss om at duppedittar til mange tusen kroner er årets sjølvsagte julegåver, er det godt at ein har motkrefter som alternativ jul og tiltaket til Lions. Det gjev håp om at både kristne og andre brukar høgtida til det den er meint til – å bry seg om andre og ting som verkeleg er viktige her i livet. God jul!