Samarbeid om brannvern

Vi skjønar godt denne skepsisen. Turen frå Bergen til Sund går ikkje berre gjennom eitt nålauge, men to. Først skal ein passere Sotrabrua som er einaste måten å kome seg til Sotra på. Deretter skal ein vere trygg på at vegen ikkje er stengd ein eller annan plass mellom Fjell gard og Skogskiftet, der einaste vegen mellom Fjell og Sund går. Skal sundsokningane kjenne seg trygge, er dei avhengig av at det er tilgjengeleg og tiltrekkeleg brannmateriell og -mannskap i kommunen.  Sund-ordførar Albrigt Sangolt peikar på at med så gode røynsler som ein har hatt med Sotra brannvern, skal det mykje til før ein fjernar brannvesenet frå lokalsamfunnet.

No er det ingen som har sagt noko om at dagens ordning med ein stasjon på Ågotnes og ein i Sund skal endrast. Fjell-ordførar Lars Lie forsikrar om at det ikkje skal bli færre brannfolk på Sotra, tvert om skal bemanninga her ute styrkast. Men utgreiinga som no skal i gang, kan føra til at leiinga skal sitje i Bergen. Med andre ord kan brannsjefen for Fjell og Sund få sitt sete i Bergen. Slik Bergen etter sløkkjeavtala i dag har ansvaret for Litle-Sotra, Bjorøy og Tyssøy.

Direktoratet for samfunnsikkerhet og Beredskap (DSB) har sagt at tettstader med meir enn 8.000 innbyggjarar skal ha kasernert mannskap i beredskap på dagtid. I praksis kan det innebera ein eigen brannstasjon. Litle-Sotra har passert dette folketalet, i tillegg er her helseinstitusjonar, mange skular og  eitt av Norges største handlesenter. Men Fjell-politikarane har lite lyst til å bruke mange pengar på å byggje ein ny brannstasjon. Dei vil heller ha eit samarbeid med Bergen. Ordførar Lars Lie (H) tek jamvel til orde for ein ny brannstasjon ved Storavatn på bysida.

I denne omgangen skal kommunestyra bestemme om eit regionalt samarbeid skal utgreiast. Det har Sund og no Fjell sagt ja til. Først ved utgangen av året skal kommunane ta  stilling til om løysingane er gode nok. Å få ei slik utgreiing på bordet kan ikkje skade. Det viktigaste er trass alt at tryggleiken og beredskapen er god. Når innsatsen trengst, må typen oppdrag ein skal ut på og behovet for kompetanse avgjera om Sotra eller Bergen skal rykka ut og leia operasjonen.