Politikarlønner

Då Frp, Høgre og KrF tok over leiinga av Fjell kommune i 2007, var dei samde om at det var fleire enn ordføraren i den politiske leiinga som skulle lønnast over kommunebudsjettet. I tillegg til varaordførar, som fekk 75 prosent av ordførargodtgjersle, skulle også dei tre komiteleiarane ha frikjøp i staden for årleg godtgjersle. Med klart fleirtal i kommunestyret var det ingen problem å få eit slikt framlegg vedteke.

Men etter at Fjell-rådmannen svinga pisken over kutt-vegrande politikarar like før sommarferien, vart ei omfattande liste av nedskjeringar vedteke. Blant postane som vart borte, var frikjøpet av fire politikarar.

Fjell er blitt ein stor og komplisert kommune å ta vare på. Dei folkevalde må leggje ned timesvis med arbeid for stette oppgåva dei er sett til. Særleg er børa tung for dei som er komiteleiarar. Det er ikkje urimeleg å unne dei å få gjort ein del av arbeidet i vanleg arbeidstid. Vi forstår også at det er nyttig for komiteleiarane å vere på jobb samstundes, slik at dei får tid til nødvendige samtalar og drøftingar.

Men det er også rimeleg at når alle andre sektorar i kommunen må skjere til beinet, så må for skams skuld også poltikarane vere med å spare.

Etter at valet var i hamn og Høgre, Frp og KrF nok ein gong sikra fleirtalet, kom dei likevel på andre tankar. Noko av det første som vart gjort, var å gjeninnføre frikjøp av varaordførar og komiteleiarar. Rimelegvis vart ikkje dette møtt med særleg glede frå opposisjonen. Sterke ord som frekt og skammeleg vart henta fram.

Det er ikkje til å kome frå at dette var ei underleg kuvendig frå posisjonen. Rett nok krev tronge tider mykje av politikarar i leiarposisjonar. Det er dei som må ta imot innbyggjarane sitt sinne og frustrasjon over dårlege eller manglande tenester. Men å godta kutt i politikarløner før valet og så slå retrett når dei hamnar i posisjon igjen, er ikkje tillitvekkjande. Den økonomiske situasjonen er ikkje blitt betre gjennom sommaren. Heller tvert om.