Politikarhets

At folk er misnøgde med politikarar, er på ingen måte noko nytt fenomen. Og det er lov å vera misnøgd når ting ikkje blir gjort noko med trass lovnader over mange år. Politikarar må finna seg i å stå lageleg til for hugg – både fordi dei styrer på vegner av folket, og fordi dei lovar mykje og sjølv kritiserer andre politikarar i harde ordelag. Men det offentlege ordskiftet har tatt ei vending dei siste åra. Med internett har kritikken blitt mykje meir framtredande og hyppigare, samstundes som den blir mindre sakleg og ber preg av rein hetsing.

Det er tre arenaer som dominerer innan politikarhetsen: Facebook, bloggar og i lesarkommentar-felta på nettavisene. Det er ikkje uvanleg at politikarar blir kalla landsforrædarar eller andre uting i kommentarar på Facebook. I diverse bloggar blir politikarar hetsa på det grovaste, og på nettavisene florerer det av folk som i lesarkommentarar legg ut om korleis framtredande politikarar berre er ute etter å berika seg sjølve og gjer sitt beste for å øydeleggja landet. Kort sagt blir politikarane tillagt heilt absurde og rett ut ondskapsfulle motiv.

Det fascinerande er at lesarkommentarane i avisene ofte ber preg av ei kunnskapsløyse som tydar på at dei som skriv der faktisk ikkje les aviser. Heilt grunnleggjande kunnskap og elementære evner til å sjå samanhengar manglar ofte blant dei hyppigaste bidragsytarane. Dette er ein ukultur, og før folk slenger ut politikarhets på nett, bør dei stoppa opp og spørra seg følgjande: Bidreg eg med dette på ein konstruktiv måte i samfunnsdebatten?

Verden er full av folk som kritiserer på brutale måtar, utan å gjera ein innsats sjølv. Politikarar fortener rett nok eit kritisk søkjelys, men dei aller fleste av dei har gått inn i politikken med eit reellt ønskje om å bidra til å gjera verden til ein litt betre stad. Som takk for innsatsen blir dei altså hetsa på det grovaste.

Dag Ole Teigen har av ulike årsaker bestemt seg for å ikkje ta attval til Stortinget. Dermed mister Sotra og Øygarden sin einaste lokale stortingsrepresentant. Det beste ein kan gjera for å sikra at nokon tek opp tråden etter Teigen, er å ikkje mobba folk vekk frå politisk engasjement.