Politikarar på nett

Som venta var det protestar då planen om å gå over til papirlaust kommunestyre vart lansert i Fjell. Men torsdag kunne det nye kommunestyret samlast rundt nye, blanke iPadar som låg klare og venta på dei. I staden for bunke på bunke med papir, kan dei folkevalde no ta med seg all den informasjonen dei treng i eit lett og lite brett. Og når fire år er omme, er ikkje kontoret heime fullt av gamle sakspapir. Der er det framleis berre eit lite nettbrett som inneheld alt som har vore gjort i løpet av fire år. Tilsette ved rådhuset slepp sette av dagar til kjedeleg kopiering. Og postmannen slepp slepe rundt på tunge dokument.

Også i Øygarden er det planen å gå over til ein politikarkvardag utan papir. iPadane ligg og ventar, det er berre opplæring som står for tur.

Sundsokningane har vore i Austevoll for å sjekke ut deira bruk av pcar. Austevollingane let vel over den nye papirlause kvardagen, både praktisk og økonomisk. Dei hadde ikkje skaffa seg iPad, men pcen med vendbar skjerm gjorde nytta. Men dei oppglødde sundpolitikarane hadde likevel ikkje tru på at dette blir aktuelt for Sund på ei stund. Truleg vil det nok også der tvinge seg fram om ikkje så lenge.

Det er så langt vi kan sjå, berre fordeler med overgang til papirlaust styre. Dette verktyet er dessutan nesten bombesikkert. Når nødvendige dokument er nedlasta, er det vanskeleg å tenke seg noko som kunne skape problem. Det einaste måtte vere at dei folkevalde let seg freiste til å forsvinne ut på nettet i staden for å konsentrere seg om kjedelege og langtekkelege debattar.