Oppvask-konferansen

Framdrifta for Sotrasambandet står i stampe etter vedtaket i Bergen bystyre om at planområdet skulle utvidast til Liavatnet. Det har skapt mykje frustrasjon vest om Sotrabrua, og mange nytta høvet til å ta den ut då sentrale politikarar frå Bergen endeleg kom til Sotra sist veke. Byråd Øistein Christoffersen (Frp) forklarte problema rundt Sotrasambandet med at «alle partane var ikkje på banen då dei skulle ha vore der. Bergen var ikkje synkron med Sotra». Men byfolka ville ikkje ta på seg skulda helt åleine, dei meiner at øyfolket må ta sjølvkritikk for manglande informasjon og kontakt med byen.

Av og til kan det vere klokt å reinse lufta, men ingen kjem vidare ved å bruke kreftene på skuldfordeling. Bystyreleiar Monica Mæland tok seg tid til ein snarvisitt til Straume for å fortelje at frå no av skal samarbeidet mellom Bergen og dei kringliggjande kommunane betrast. Det skal nyskapinga Bergensalliansen sørge for. Dette er ein arena der topp-politikarane skal møtast, og Mæland slo fast at dette skal bli den viktigaste møteplassen for politisk leiing i regionen.

Ei anna nyskaping i år er Regionrådet Vest, som består av Fjell, Sund, Øygarden og Askøy. Den oppstod mellom anna fordi øyane i vest har mange felles utfordringar og eit behov for å samle kreftene og vise styrke overfor bykommunen. Høgt på agendaen til Regionrådet Vest står Sotrasambandet. Det skulle dermed ikkje mangle på møteplassar og høve til å drøfte moglege løysingar.

Som så ofte før vart Stavanger-regionen brukt som døme på godt samarbeid og fruktene som kan haustast ved at by og land står saman. Vi kan håpe på at Sotrasambandet blir saka som gjer at samarbeidsklimaet blir betre i vår region. For som stortingsrepresentant Per Rune Henriksen sa: Det som er bra for Bergen, er bra for kommunane rundt. Og det som er bra for kommunane rundt, er bra for Bergen.