Næringsutvikling

Næringsutvikling er vanskeleg, det er vanskeleg å få til, og det er vanskeleg å måle det ein eventuelt har fått til. Regionen har prøvd seg med ulike løysingar, både felles og kvar for seg. Før danninga av Aktivest tidleg på 90-talet streva dei tre kommunane kvar på sin front, og kom fram til at det beste var å gjere noko felles. Men Aktivest vart ikkje det ein håpa på, løyvingane forsvann gradvis, og det felles tiltakskontoret vart etter kvart nedlagt. Kommunane starta på ny frisk kvar for seg, men fann etter kort tid at det nok var betre å satse felles likevel. Så kom Gode Sirklar. Etter kort tid begynte dei folkevalde å etterspørje konkrete resultat.  Det vart sett i gang eit evalueringsprosjekt som gav gode karakterar til Gode Sirklar. Likevel valde Fjell å redusere løyvinga til selskapet. Sund har lenge hevda at dei har fått for lite att for pengane dei har investert, og meiner at det blir betre resultat om dei styrer næringsutviklinga sjølv.

Også i Øygarden er det røyster som meiner at dei bør satse på eigne krefter når det gjeld næringsutvikling. Dette er ei av Høgre sine hjartesaker, og Ap har ikkje hatt noko å innvende. Når dei to andre kommunane vel å redusere løyvingane til Gode Sirklar, er det forsåvidt ikkje noko poeng for Øygarden å halde fram med uavkorta løyvingar.

I tida etter Regionrådet Vest vart etablert, var det mange store vyer for korleis Fjell, Sund, Øygarden og Askøy kunne utvikle seg til ein sterk region med ei klar eiga røyst som kunne utvikle næringslivet i regionen saman. Askøy var inne på tanken om å vere med i Gode Sirklar. Men det vart berre med tanken.

Dermed går kommunane i regionen inn i eit krevande år med svevande tankar om næringsutvikling innanfor eigne grenser. Innbyggjarane ser på regionen som ein arbeidsmarknad, og næringslivet er heller ikkje så opptatt av kommunegrenser.

Det er vanskeleg for kvar enkelt kommune å få til vellukka tiltak for næringsutvikling, og erfaringsmessig blir slikt ofte ein salderingspost. Det er difor grunn til å håpa på at kommunane ikkje gløymer tanken om felles satsing på næringsutvikling, enten det skjer i regi av Gode Sirklar eller andre.