Motstand mot vindmølle

I forrige veke vart det klart at Enova, det statlege organet som er etablert for å fremje ei miljøvennleg omlegging av energibruk og energiproduksjon i Norge, har tildelt Sway 137 millionar kroner. Pengane skal brukast til å bygge prototypen av ein ny vindkraftturbin to-tre gongar større enn dei som no er i kommersiell drift.  Planen er at dette er vindmøller som skal plasserast ute på havet.

At dette forsøksprosjektet er tenkt lagt til Øygarden, har vore kjent lenge. Saka har følgd vanleg politisk saksgang med avsluttande handsaming i kommunestyret. Debatten har ikkje vore udelt positiv. Det har vore reist bekymring for støy og andre ulemper ved å ha ei slik svær vindmølle i nærmiljøet. Likevel ønskte eit fleirtal i kommunestyret prosjektet velkome til Øygarden. Sju representantar stemte i mot.

Ei stund etter at vedtaket var klubba gjennom, vart det oppretta ei facebook-gruppe mot testturbinen. Med om lag 250 medlemmer kan ein ikkje akkurat seie at det er ein storm av protestar mot prosjektet i Øygarden. Men sjølv om han innser at han er seint ute, stiller William Oen seg i spissen for å ta oppatt kampen mot vindmølla.

Trass den svimlande summen på 137 millionar kroner frå Enova trengst det meir pengar for å starte bygginga av testturbinen. Sway håpar på 100-120 millionar kroner frå investorar. Dei treng 400 millionar kroner for å setje i gang med prosjektet.

Så det kan framleis ein liten sjansen for at William Oen og støttespelarane hans får viljen sin. I såfall går Øygarden og alle kommunane i regionen glipp av eit framtidsretta prosjekt som kan gi gode ringverknader for næringslivet. Ein kan like det eller ikkje, men alt tyder på at vindmøller blir ein viktig brikke i utviklinga av framtidig energiproduksjon.