Miljøfyrtårn

Heldigvis er det framleis både privatpersonar og verksemder som tenkjer klima. Alle tre kommunane vest om Sotrabrua er såkalla Miljøfyrtårn-kommunar. Det gir kommunen høve til å nytte seg av dei tenestene som Stiftelsen Miljøfyrtårn tilbyr i arbeidet med å fokusere på miljø både i kommunal og privat verksemd. Men førebels er det berre Fjell som er komen så langt at dei har fått ein godkjent sertifisør som kan sertifisere andre verksemder.

Den førebels siste verksemda i Fjell som er blitt Miljøfyrtårn-merka, er Sartor Storsenter. Espen Eldstad, som er sertifisør i Fjell, er svært nøgd med at senteret har fått denne miljømerkinga og håpar at det skal inspirere andre til å henge seg på. Stiftelsen Miljøfyrtårn reklamerer med at fokus på miljø gir ettertrakta biverknader som reduserte kostnader, auka inntekter og betre omdøme. 

Panorama konferansehotel i Austefjorden i Sund er blant verksemdene som har oppdaga dette. Dei skal bruke varmen frå sjøen til både til oppvarming og kjøling. Dette gir god miljøgevinst og reduserte straumutgifter.

For nokre år sidan var vi alle opptatt av miljø og klima. No er det finanskrisa som pregar oppslag i media og som dermed opptar tankane våre. Det betyr ikkje at klimatrusselen er blitt mindre. Tvert om, forskarane hevdar no at endringane kjem fortare enn dei frykta. Veret som vi har klaga på sidan i vår, kan  bli det normale i åra som kjem.

Klimaet har vi alle ansvar for, og vi kan alle gjere litt. Mellom anna kan vi velje varer og tenester frå produsentar som tar miljøet på alvor.