Meir nei frå Fylkesmannen

Ikkje før er Fjell-ordførar Lars Lie komen heim frå samtale med Fylkesmannen om utbygging på Litle-Sotra så ber det laust igjen. Kristofer Lie, Arvid Ulveseth og Telle Eigedom vil bygge 100 bustader i Huldraspelet mellom Fjell gard og Ulveseth. Planen er å bygge einebustader, rekkehus og terrassehus i eit område der det i dag er fem hus. Fylkesmannen meiner dette er for mykje, men er ikkje negativ til ei viss utbygging i området.

Dermed er vi ved det store spørsmålet når det gjeld utbygging i regionen vår. Skal vi godta fortetting av Straume slik at det blir som ein liten by, eller skal vi spre bygginga utover heile regionen? Vi har mange gode eksempel på det siste. Vi kan nemne nye bygder som Hjelteryggen, Tona, Åttringen, Maggevarden, Halsvarden og Angeltveit. Folk som har busett seg her, har funne seg vel til rette. Men det er ikkje til å kome forbi at det byr på store utfordringar i høve til infrastrukturen når nye store utbyggingsområde blir fylt med folk. I slike felt er det også problematisk å få til sosiale møteplasser.

Når Fylkesmannen set foten ned, er det alltid nokon som rasar. Men at det faktisk og er mange som er glade, kjem ofte mindre tydeleg fram. Vi veit at når Fylkesmannen stikk kjeppar i hjulet for den mykje omtala Sjøfronten, er det mange som frydar seg over det.

Ein ting er sikkert, Sotra og Øygarden kjem til halde fram med å vere populært byggeland. Like sikkert er det det dukkar opp motstand mot ulike prosjekt. Det overordna målet må vere å få til gode bumiljø samstundes som vi gjer alt for å ta vare på vakre friluftsområde.