Liv og røre på Vestsida

Det var tilfeldig at desse to arrangementa hamna på same helg. Langøymarknaden har gått av stabelen i slutten av august så lenge den har vore arrangert. Men i år var det lenge usikkert om det vart marknad på den tradisjonsrike handelsstaden, sidan det ikkje lenger er nokon dagleg leiar til å ta seg av planlegging og avvikling.   Havfestivalen er heilt ny av året, og bestemte seg for dato før det var klart om det vart marknad på Landøyna.

Med to så like arrangement på nesten same staden same helg, var det knytta spenning til om det kom til å vere publikuminteresse nok for dei begge. Fjell kystlag og Lokøy velforeining syntest det var kjedeleg at Havfestivalen kom akkurat denne helga. Men det viste seg at  bekymringa var ubegrunna. Folk strøymde til begge stadene, og mange valde både og.

Gert Nordvik, arrangøren av Havfestivalen, er så nøgd med helga at han lovar festival neste år også. Om det blir Langøymarknad, heng meir i lufta, men også Fjell kystlag og Lokøy velforeining ønskjer å halde fram med den åtte år lange tradisjonen. Spørsmålet er om det finst kapasitet til å gjennomføre arrangementet.

Både Kystkultursenteret Langøy og den tradisjonsrike handelsstaden Storesund er kulturminne som fortel om livet på øyane gjennom generasjonar. Det er stader med historisk sus som gir god stemning og er ypperlege samlingstader for ulike arrangement. Når folk i helga sa jatakk, begge deler, viser det at grunnlaget er til stades for meir liv og røre på Vestsida i Fjell.