Konstruktive tunneltankar

Sund kommune har i mange år jobba for at Lerøy og Bjelkarøy skal få vegsamband til Bergen sør. Men dei siste månadane har planane tatt viktige steg framover. Det har ført til panikktilstandar blant enkelte i dei berørte områda på bergenssida. For nokre veker sidan var det folkemøte på Hjellestad om fastlandssambandet. Og der var stemninga mildt sagt oppheita, med harde og dels spottande utfall mot både vegplanane og dei som bur på øyane.

No har altså Ytrebygda bydelsstyre hatt saka oppe til handsaming. Og der var stemninga langt meir konstruktiv og forsonande enn på folkemøtet på Hjellestad. Stig Hammersland (Ap) i bygdelsstyret seier rett ut at han ikkje trur steminga på folkemøtet representerer den gjengse haldninga blant innbyggjarane på Hjellestad. Og eit fleirtal i Ytrebygda bydelsstyre går altså inn for alternativet med kort tunnel frå Bjelkarøy til Hjellestad.

I kva grad deira val av alternativ kjem til å ha særleg å seia, står att å sjå. Men det viktigaste er at dei går inn for eit alternativ, istadenfor å prøva å nytta høvet til å stikka kjeppar i hjula for fastlandssambandet. Dermed går prosessen framleis trygt framover, og ein kan gleda seg over at bydelsstyret klarar å sjå betydeleg lenger enn si eiga nase. Men det vil uansett gå mange år før folka på Bjelkarøy og Lerøy kan køyra strake veien til fastlandet.