Jul i varmt selskap

Tiltaket har kome på plass etter ei idémyldring i regi av Frivilligsentralen. Dei som står bak arrangementet, er entusiastiske og aktive. Mykje er på plass allereie, og alt tyder på at det blir ei fin og god feiring i dei idylliske lokala på Kvernepollen rorbuer. Det store spørsmålet er kor mange som kjem.

I dei store byane er det lang tradisjon for julekveldsarrangement som rettar seg mot dei som kanskje ikkje har andre alternativ. Det er ofte fokus på rusmisbrukarar som får seg ein kveld med hjertevarme. Men også andre kan ha godt av eit slik fellesskap. Julekvelden i Noreg er den dagen framfor nokon då ein skal vera saman med dei ein er glad i. Og ein veit at folk som er einsame, av denne grunn gjerne føler seg ekstra einsame på julekvelden. Det kan vera eldre som bur åleine og av praktiske årsaker ikkje kjem seg til feiring med familie som gjerne bur langt unna. Men det finst og einsame unge i jula, unge som av ulike årsaker ikkje har andre å koma saman med på denne kvelden.

 I vår tid er familiebanda gjerne meir kaotiske og mindre tette enn før, så det er ikkje sjølvsagt at alle har nokon å feira dagen med. Terskelen for å gå til vener eller fjerne slektningar på julekvelden, er høg. På ein slik dag ønskjer ein gjerne ikkje å trengja seg på. I så måte er den felles julefeiringa i Øygarden eit framifrå tiltak, og det er all grunn til å håpa at folk nyttar seg av tilbodet. Det er ingen grunn til å kjenna seg stigmatisert, og det kan godt henda at også heile familiar kan få ei ny og god oppleving om dei i år legg julefeiringa til Kvernepollen.