Idioti for fulle segl

Skepsisen i Hjellestad-området går mellom anna på at bruer vil vera til hinder for seglbåt-aktivitetane der. Dessutan meiner bebuarane at Hjellestadvegen ikkje toler auka trafikk. Og sjølv om rekkefølgekrava sikrar dei vegutbetring før fastlandssambandet kjem, er dei skeptiske. På folkemøtet ga fleire uttrykk for at dei ikkje vil ha betre veg, då dette kan gå ut over hagane deira.

I eitkvart vegprosjekt skal ein høyra på dei som blir berørt. Og folka på Hjellestad har all rett til å uttala seg. At dei har ein viss skepsis, kan ein og forstå. Men tonen på folkemøtet var rett og slett forkasteleg. Til dømes: «Eg vil lansera eit nytt alternativ. Gi heller dei folka på øyane fem millionar kroner kvar, så kan dei kjøpa seg ein flott eigedom på Mildehalvøya», som Jan Hjellestad sa. Eller: «Vi ser at det er 60 menneske på eit par holmar som ønskjer seg bru. Men kva blir konsekvensen? Sjølvsagt blir konsekvensen at alle som bur på øyar langs heile Noregs kyst vil ha det same», som Egil Mollekleiv ordla seg.

Lerøy og Bjelkarøy er langt meir enn to holmar. Og å bruka eit folkemøte til å koma med sleivspark som at øyfolket må få pengar til å kjøpa seg eigedom på fastlandet, er rein og skjær idioti. Bergensarar flest har kvitta seg med fordommar og spit knytt til omlandskommunane og strilebegrepet. Folkemøtet tordag viste at Hjellestad-fiffen heng att i gamaldags klassetenking og forkastelege fordommar. Om dei ønskjer å bli tatt på alvor i spørsmålet om fastlandssamband frå Lerøy og Bjelkarøy, må dei skjerpa innstillinga og endra argumentasjonen.