Gladmelding for Øygarden

Aktiviteten ved Sture har gått nedover frå ein topp på 800.000 fat olje til nivået i dag som ligg på 350.000 fat. Det var difor ikkje heilt uventa då Statoil i vår kom med meldinga om at det var sett ned ei prosjektgruppe som skulle  vurdere nedlegging av Sture. Fredag kunne både dei 200 tilsette og Øygarden kommune pusta letta ut, då kom gladmeldinga om at planane er skrinlagt.

Førebels har det berre kome lovnad om uendra drift i ein periode framover. Men ei utsetting er uansett eit godt teikn. Det betyr at Sture framleis er med i biletet når ilandføring av gigantiske oljefunn på Aldous- og Avaldsnes-felta skal planleggjast. I så fall er det snakk om mange års forlenga levetid for Sture.

For Øygarden betyr dette gode inntekter. Men politikarane har likevel blitt nøydde til å tenkje seg om før dei brukar alt på eigen kommune. Rådmann Torgeir Sæter har mana dei til å vere flinkare å dele på oljeinntektene. I budsjettet for 2012 la han inn ein post på 6 millionar kroner som skulle brukast til regional utvikling. Denne skulle aukast gjennom dei fire åra i perioden til 12 millionar kroner  i 2015. Forslaget er teke vel i mot blant politikarane, men ikkje for neste år. Dei 6 millionane forsvann ut då budsjettet var behandla i formannskapet.

Dei fleste av oss er slik at når inntekta aukar, så aukar også forbruket, utan at vi eigentleg kan peike på kva vi har fått att for det. Dette er også ei erkjenning Øygarden har kome fram til. Det blir brukt for mykje pengar på drifta utan at ein kan vise til vesentleg betre tenester enn nabokommunane. Målet om å byggje opp eit fond til regional utvikling er ein god tanke. Dei fire kommunane i Regionrådet Vest har mange felles utfordringar og etterkvart eit omfattande interkommunalt samarbeid. Det som gagnar regionen vil også vere til nytte for dei enkelte kommunane. Øygarden vil tene på å vere gavmild og raus.