Gapar høgt og fort

Det er mange partar involvert i det imponerande festningsanlegget: Fjell kommune, Museum Vest og Stiftinga Fjell festning. Diskusjonen om kven som skal betala straumrekninga, tyder på at kommunikasjonen mellom desse tre partane kunne ha vore betre då grunnlaget for festningen som museum vart lagt. Men straumrekninga er uansett berre ein liten del av det som kan bli eit stort problem: Fjell kommune sine utgifter knytt til Fjell festning og kringliggjande anlegg.

Det finst planar for å vidareutvikla Fjell festning. Og med tanke på den enorme storleiken på det verdifulle krigsminnet, er det knapt grenser for kva planar og vyer ein kan ha. Men det kostar. Og sjølv om ein ønskjer statlege pengar, er det mykje som tyder på at Fjell kommune må ta ein stor del av utviklingskostnadane sjølve. Det blir fort dyrt.

Og samstundes har kommunen planar om eit hestevognmuseum ved festningen. Vognene har dei rett nok fått i gåve, men å få eit slikt museum på plass og driva det, er alt anna enn gratis. Det kan virka som om Fjell kommune gapar for høgt og for fort når det gjeld festningsområdet, utan å skjøna kva vyene vil innebera av kostnader.

Samstundes med vyene her, er situasjonen knytt til Galleri Haganes og Langøy Kystkultursenter uavklart. Fjell kommune må få på plass ein heilheitleg og klar strategi rundt desse kulturtilboda, og det må prioriterast klart kva ein skal bruka pengar på. Dette blir mellom anna ein jobb for den ferske kultursjefen Lennart Fjell. Gapet mellom vyer og løyvingar tyder på at kultursjefstillinga i Fjell ikkje kom ein dag for tidleg.