Fritidstilbod

Mange fritidsaktivitetar gjev også mosjon og sikrar ei god fysisk utvikling. Men mange stader skortar det på tilboda. Fotball dominerer stort og er ein positiv aktivitet i seg sjølv. Men det er mange som ikkje finn seg til rette med fotball og som ønskjer seg andre aktivitetar. Og det er det ofte mangel på utanfor dei store byane.

I dette perspektivet er det svært gledeleg at Halvard Måge og medhjelparar har fått på plass eit imponerande dansehus på Torsvik i Øygarden. Så langt har dansehuset vore ein storsuksess, med over 400 øygardingar og nokre fjellsokningar som dansar breakdans, salsa, swing, linedance og diskofunk.
Over nyttar vert tilbodet utvida frå 15 til 27 danseklassar.

Dansehuset er eit framifrå døme på at det finst både interesse og etterspurnad etter andre tilbod enn dei tradisjonelle, store idrettane. Og det er også eit bevis for at dei som ikkje likar fotball, ikkje er allergiske mot fysisk aktivitet. Tradisjonelt har gjerne politikarar tenkt at dei som ikkje spelar fotball, treng ungdomsklubbar. Men heller ikkje alle finn seg til rette i ungdomsklubbar, og dei siste åra har ein dessutan opplevd at mange ungdomsklubbar vert nedlagt av sparelystne politikarar. At det private initiativet til dansehus i Øygarden har lukkast, viser at utradisjonelle og nye tilbod kan verta ein fulltreffar. Dersom dansehuset klarar å halde oppe interessa, vil det vera ein vesentleg trivselsfaktor i den nordre delen av regionen vår.

Fritidstilbod handlar ikkje berre om born og unge. Skal ein kommune eller ein region kjennast god og spanande å bu i, må også vaksne kunna henta nye impulsar der. Dansehuset i Øygarden gjev også tilbod til vaksne, og er med på å gjera Sotra og Øygarden til ein region som ikkje er avhengig av å støtta seg på fritidstilboda i Bergen.
Dersom områda vest for Sotrabrua skal halda fram å veksa som ein sjølvstendig region, må ein satsa på fritidstilbod og kultur. Difor er det også grunn til å helsa planane om stor kino på Straume hjarteleg velkomen.