Forsøpling og gjenbruk

Returpunktet ved Sund senter skal nyttast til glas, metall, papir og plast. Tilbodet gjer det lettare for folk å kvitta seg med denne typen avfall på ein forsvarleg måte. Diverre er det altså ein del som misbruker tilbodet, og nyttar det til å kvitta seg med all slags skrot. Bir har mellom anna funne datautstyr og sekkar med restavfall. Det burde vera barnelærdom at restavfall nettopp er restavfall, og ikkje skal kastast i ein returstasjon der heile poenget er at ting er sortert for å letta avfallshandtering og gjenbruk. Datautstyr og anna elektrisk avfall kan leverast til alle butikkar som sel slikt, og i tillegg til gjenbruksstasjonar. Det skulle såleis absolutt ikkje vera nokon grunn til å forsøpla returpunkt som det i Skogsskiftet med denne type avfall.

Bir viser til at dei brukar store ressursar på å rydda opp på returpunkta, og at dette er med på å auka renovasjonsavgifta. Dermed får forsøplinga konsekvensar for alle brukarane: Enten blir returpunktet ved Sund senter stengt, eller så må ein betala meir i renovasjonavgift.

Statistikk viser at me her i landet er svært flinke på både innlevering og gjenvinning av mellom anna elektrisk avfall, og med gjenbruksstasjonar og returpunkt har me gode tilbod også for andre typar skrot og bos. Diverre er det alltid nokon som ikkje bryr seg med å gjera ting på rett måte, og difor forsøplar returpunkta. Deira slurv går i neste omgang ut over alle dei som er lovlydige og pliktoppfyllande. Det er difor all grunn til å oppmoda desse om å skjerpa seg.