Fastlandssamband eller ferje

Men nyleg kom Hordaland fylkeskommune med eit sjuande alternativ, som dei lanserer som eit kompromiss mellom å behalda dagens ferje og byggja fastlandssamband: Ny pendelferje med auka frekvens mellom Bjelkarøy og Hjellestad.

Inne i dette alternativet ligg bygging av den vedtekne vegen frå Lerøy til Bjelkarøy, så langt at vegen går til ferjeleiet på Bjelkarøy, og nye ferjekaiar på Bjelkarøy og Hjellestad. Skyssbåten mellom Lerøy og Klokkarvik som er planlagt sett inn dersom fastlandssamband til bergenssida blir realisert, kan brukast også dersom ein går for pendelferje, meiner fylkeskommunen.

Alternativa som er presenterte i framlegg til planprogram, skulle etter planen reduserast til eit par alternativ rundt årsskiftet. Så skal ein utarbeida nærare planar og konsekvensutgreiingar for desse. At Hordaland fylkeskommune no tilrår at ein ser nærare på eit nytt alternativ, kan floka til denne prosessen.  Sånn sett kan det minna litt om Bergen kommune sitt krav om endå eit alternativ for nytt Sotrasamband. Men medan Bergen sitt krav kan utsetja eit livsviktig sotrasamband i fleire år, får neppe fylkeskommunen sitt Lerøy/Bjelkarøy-innspel like alvorlege konsekvensar.

Spørsmålet er om pendelferje heller enn fastlandssamband til bergenssida kan få såpass støtte at det blir eit reelt alternativ. Prosjektleiar Arne Bergo hjå Sund kommune peikar på at målet er å få på plass eit fastlandssamband til øyane, og at ferje-alternativet ikkje ivaretek dette. Men samstundes er det stor motstand på Hjellestad mot bru, og for motstandarane kan fylkeskommunen sitt innspel koma som ei gåvepakke. Dersom fylkeskommunen meiner at pendelferje mellom Bjelkarøy og Hjellestad vil vera ei brukbar løysing, kan bebuarar på Hjellestad ta dette med i kampen mot bru.