Farleg fyrverkeri

Det siste året med rakettar vart det registrert 151 skader i Noreg som følgje av uhell med desse rakettane. Åra etter har det naturleg nok vore ekstremt få skader med rakettar. I same tidsrom har talet på skader forårsaka av andre typar fyrverkeri halde seg stabilt. Resultatet er dermed ein kraftig nedgang i fyrverkeriskadene totalt sett, ifølgje statistikk frå Direktoratet for samfunnssikkerheit og beredskap.

Ein er likevel ikkje kvitt fyrverkeriskader. På Sotra vart ein mann og to barn skadde av fyrverkeri ved inngangen til 2012. Elles i landet var det mange som fekk skader på augene då dei skulle feira med fyrverkeri. Det viser at bakkefyrverkeri ikkje er ufarleg. Og det kan virka som om dei såkalla bakkebatteria blir stadig kraftigare, no når folk ikkje lenger kan kjøpa rakettar. Reglane tillet bakkefyrverkeri med ei sprengkraft som langt overgår mange militære handgranatar. Då seier det seg sjølv at det kan oppstå alvorleg personskade ved uhell.

Men det er viktig å skilja mellom uhell på grunn av feilkonstruert fyrverkeri og uhell som skuldast rein dumskap. Styresmaktene må sikra at dei store bakkebatteria som blir selde i Noreg, er stabile og trygge og ikkje legg til rette for feil bruk. Men ein kan knapt forby bakkebatteri på bakgrunn av at nokre få gjer idiotiske ting med dei. At ikkje mindreårige skal få tilgang til fyrverkeri er sjølvsagt – og at ein bør vera rimeleg edru for å handtera så kraftige saker bør vera like sjølvsagt.

Klarar folk å halda seg i skinnet og bruka sunt folkevett når dei skal feira nyttår, vil talet på uhell og skadar gå ned. Då vil me framleis kunna gleda oss over ei fargesprakande nyttårsfeiring, utan å vera redde for å gå på ein smell.