Eit vakrare sentrum i nord

Liegruppen er på hogget når det gjeld heile kommunen, ikkje berre Straume og Bildøyna. Saman med Sotra trelast kom dei sist veke med ein «visjon» for å gjere Ågotnes til eit moderne sentrum i nordre delen av Fjell kommune. Eit torg med miljøgate og bussterminal kan binde saman eit Ågotnes som i dag er delt av riksvegen.

Ågotnes vil i overskodeleg framtid vere prega av det som har gjort denne bygda til eit sentrum, CCB og alle industriarbeidsplassane som er komne i kjølvatnet av kystbasen. Ingen av dei som har bygd her, har hatt estetiske krav høgt på lista. Dei fleste bygga ber preg av at det skulle byggjast kjapt og billig. Få har late seg inspirere av den fantastiske naturen som prega Ågotnes fram til industrieventyret starta. Men den er framleis lett å få auge på dersom ein kjører forbi industriområdet mot Vindenes.

Trass i usjarmerande omgivnader har Ågotnes utvikla seg til ein populær plass å bu. Det er ikkje alltid utsikta som er viktigast når ein vel kor ein skal slå seg ned, og Ågotnes har mykje å by på. I tillegg til nærleik til arbeidsplassar, finst det framleis mykje natur å nyte, og tilgangen til sjø er der framleis. Dessutan er det rimeleg sentralt, både sett i høve til Straume og til Bergen. Her er barnehagar, skule, legesenter og butikkar. Med andre ord det som trengst for at barnefamiliar skal kunne trivast og bygge eit sosialt liv.

I 2007 gjorde Fjell-politikarane vedtak om å starta arbeidet med ein ny plan for senteret i nord. Men for å få til ein heilskapeleg plan er det ei viktig brikke som manglar: Kvar skal hovudvegen gå? Gjennom sentrum eller utanom? Statens vegvesen og politikarane har så langt ikkje landa vegløysinga for Ågotnes-området. Mykje tyder på at det kan ta mange år før det blir realisert ein ny veg nordover mot Øygarden. Det gjer det til ei utfordring å leggja gode planar for eit vakrare sentrum i nord.