Eit smykke til Sund-ordføraren

Lenge var alle ordførarane i regionen utan ordførarkjede. Når ordførarar var samla, merkte dei tre seg ut med bringe utan smykke medan andre ordførarar stod rake i ryggen og blenkte. Men under Jan Utkilen (Sl) sin ordførarperiode skaffa Fjell seg eit kjede. No får snart også Ove Trellevik i Sund dette symbolet som viser kven som har høgaste makt og mynde i kommunen. Øygarden sin nybakte ordførar, Otto Harkestad, ser derimot  ikkje behovet. Han meiner det er noko som ikkje stemmer med små kommunar og ordførarkjede.

I vår del av verda er vi ikkje så nøye med kleskodar. Det er ikkje vanleg at vi dressar oss opp når vi skal på jobb. Dei fleste av oss stiller gjerne i dongeri og genser viss vi føler for det. Dei færraste finn det passande å møte på jobb i kvit skjorte og slips, ikkje ein gong sjefane. Unntaket er verksemder som har mykje med utlandet å gjere, då er kleskoden straks viktigare å passe på.

Ordførarane rundt om i landet er nok blant dei som er mest nøye med korleis dei kler når dei er på jobb. Likevel skil dei seg ikkje nemneverdig ut frå kven som helst, verken i kvardag eller fest. Men om ordføraren har eit kjede å henge om halsen i høgtidelege høve, veit alle straks kven han/ho er. Eit ordførarkjede med symbol som er unike for kommunen han eller ho kjem frå, er eit klenodium. Det gir respekt og verdigheit til personen som ber det. Noko som er heilt på sin plass, for det er jo folket som har valt denne personen til å representere seg.

Spørsmålet om ordførarkjede er ikkje noko stor sak. Vi gledar oss likevel saman med Sund-ordføraren for at han også no snart kan stå og skine saman med andre ordførarar når høvet tilseier det.