Eit kraftsenter

Anne Lise Tellnes frå Mental Helse kunne slå fast at Øyane DPS er ein draum som er gått i oppfylling. Alle tilbod som ho har drøymt om, finst i dette bygget, som huser eit tilbod til vaksne over 18 år med psykiske lidingar. Her er 20 sengeplasser for kort- og langtidbehandling og poliklinisk behandling både for enkeltindivid og grupper. 80 tilsette vil ha sitt daglege arbeid ved senteret.

For kommunane Sund, Fjell, Øygarden og Askøy er Øyane DPS eit historisk bygg. For første gong har regionen fått eit sjukehus innan eigne grenser. Folk i desse kommunane har alltid vore nøydde til å reise til Bergen når dei har blitt sjuke, uansett kva som plaga dei. I våre dagar med moderne kommunikasjon har dette stort sett vore ukomplisert. Men som vi ser av den intense kampen for å halde på lokalsjukehusa, betyr det mykje å ha gode helsetilbod i sitt eige nærområde.

Når Helse Bergen har valt å plassere Øyane DPS på Straume, er det med den erkjenninga at øyane vest om Bergen er blitt ein folkerik region. Med rundt 60.000 menneske og i stadig vekst har vi like mange innbyggjarar som ein middels norsk by, færre enn Drammen, men fleire enn Sarpsborg. Straume har i den seinare tid fått fleire nye tilbod innan helse. Mellom anna kan no folk som er ferdigbehandla på Haukeland sjukehus, få pleie og stell på den intermediære avdelinga som ligg like ved sjukeheimen. Og midt i mellom sjukeheimen og Øyane DPS ligg det flotte, nye terapibygget som vart opna for nokre år sidan. Dette er viktige helsetilbod, både for psykisk og fysisk helse.  

Ordførar Eli Berland peika på at det nærast har blitt ein vane å helse nye tilbod velkommen i regionen. Om ikkje lenge blir det ein ny fest, men det blir på Askøy der det kjem ei ny avdeling for lindrande behandling.