Ein tankevekkar

Her ute på øyane slepp vi heldigvis slikt. Ikkje har vi så store vegkryss som Danmarksplass, og ikkje har vi fjell som sørgjer for at same lufta blir liggande i dagevis når det blir kaldt og klart. Likevel er ikkje forureininga i bykjernen oss uvedkomande. Trafikken går tett begge vegar, og kvar gong vi tar bilen inn til byn, er vi medskuldige i forureininga.

Politikarane i Bergen måtte ty til drastiske tiltak for å få utsleppa ned på eit nivå som ikkje var helsefarleg. At bilkjøringa skulle avgrensast med oddetal- og partalkjøring, synest mange var å ta vel hardt i. Og det var mange som valde å gi blaffen. Til alt hell kom vinden og flytta forureininga ein annan stad, slik at kjøremønsteret kunne gå tilbake det normale. Men nokre få, fredelege dagar vart køane reduserte, til stor glede både for dei som hadde pustevanskar og for dei som var på vegen og kom fort fram.

Det er likevel rimeleg å tru at dette berre er forsmaken på kva som kan kome. Det er for mange bilar på vegane, og noko drastisk må gjerast for å få biltettleiken ned. Forslaget om køprising har blitt henta fram igjen. Det er eit tiltak som truleg gir effekt, og det spørst om det er mogleg å unngå det. Men det krev at eit godt kollektivtilbod er på plass.

I vår region treng vi først og fremst ein plass å parkere. Mange billistar leita fånyttes etter parkeringsplassar før det var klart at Sartor desse kritiske dagne igjen opna sitt anlegg for alle. Den såkalla McDonalds-tomta framfor Sartor er foreslått til parkeringsplass. Det burde vere enkelt å gjere eit hastvedtak og ordne dette så snart som mogleg.