Draumen om eit tverrsamband

Det har vore leika med tanken om eit samband som bind saman olje- og gassanlegga på Kollsnes og Stura i Øygarden og Mongstadanlegget i Nordhordland ei stund. Med forprosjektet som Helge Hopen har utarbeidd, er arbeidet kome eit steg lengre. Det viser at kjøreavstanden mellom Mongstad og Kollsnes blir halvert med eit slikt samband. Men som ein ringveg rundt bykjernen som skal avlaste Bergen, vil den ikkje fungere i særleg grad.

Bortsett frå i dei ytste utkantar er det stort sett slik at der det blir bygd ein veg, kjem det også utvikling. Øyane vest og nord om Bergen er attraktive, både for folk som skal busetje seg og for dei som treng næringsareal. Ein veg over øyane i vest, kan utløyse store areal. Men prioriteringa av nye vegar her til lands blir sjeldan gjort utifrå kva om kan skje. All planlegging tar utgangspunkt i dagens situasjon og dagens behov. Her er det nye Sotrasambandet eit godt eksempel. Politikarar i Fjell var ei stund svært positivt innstilt til eit nytt samband i sør. Dei såg klart og tydeleg den gevinsten det var for heile regionen å få ein ringveg. Men vegvesenet viste til at det er ikkje i sør trafikken går i dag. Den går over Sotrabrua, naturleg nok, sidan det er der det er bru. Gode, framtidige verknader av ei vegløysing i sør var verken vegevesenet eller Samferdselsdepartementet interesserte i å høyre noko om. 

Det største problemet Bergen og omland slit med no, er all trafikken som blir pøst inn i bykjernen, trafikk som ikkje har noko i byen å gjere. Vegprosjekt som kan avlaste byen, vil derfor møte velvilje blant politikarane i Bergen. Når det no viser seg at Tverrsambandet Vest berre i liten grad vil avlaste byen, vil truleg interessa hjå vegstyresmaktene vera tilsvarande avmålt. Då kan det fort ende med at prosjektet berre blir ein vakker draum.