Draumen om bru i sør

Slik saka står no, gir det rom for både den eine og den andre til å drøyme sine eigne draumar om nytt sotrasamband. Framdrifta som var så lovande for berre eit halvt år sidan, har stoppa heilt opp. Medan vi fortvilar over stadige køar og stengte vegar, opplever vi for alvor kor sakte den offentlege mølla kan male. Og kor lite det skal til for å stikke kjeppar i hjula for viktige prosjekt.

Det verkar omtrent umogleg å få til eit vegsamband i nord som alle partar  kan godta. Då kjennest det naturleg å ta opp att tanken om eit samband i sør. Før prosessen starta for alvor, og før kommunevalet i 2007, var det trass alt stor velvilje i dei fleste politiske leirar for eit samband i sør.

Det er trass alt mange gode argument for dette alternativet. Dei har vore lista opp før, men det skader ikkje å ta dei omatt. Først og fremst gir det øyane i regionen ein etterlengta ringveg. Det opnar for attraktivt byggeland i Sund, og dermed ei vitamininnsprøyting for denne delen av Sotra. Det vil tvinge fram betre standard på vegen mellom Fjell  og Sund. Det vil gi avslastning for Litlesotra der det er problematisk å finne fornuftig vegtrase. Det gir heile regionen eit trygt alternativ dersom vegen over Litlesotra vart stengt.

Men vegvesenet slår bombastisk fast at planane er uendra. Det blir eit samband i nord – ein eller annan gong.