Det hjelper å vise seg

Kultursjef i Øygarden Bernt Hjørnevik og dagleg leiar i Nautnes fiskevær Ove Forstrønen trur det er marknadsføringa som er årsaka til ein omsetningsauke på 25 prosent. I vår gav Øygarden kommune ut eit vakkert magasin der OL-helten Alexander Dale Oen pryda forsida. Han prydar også plakaten som heng i monteren på turistinformasjonen i Bergen. Gjennom ein tre-årig avtale med turistinformasjonen leiger Øygarden ein eigen utstillingsplass.

Satsing på turisme har vore på agendaen i regionen i mange år. Men det har vist seg vanskeleg å få til noko felles for alle tre kommunane vest om Sotrabrua. I Fjell har det mellom anna lenge vore etterlyst ein plass der ein kan henge opp eit kart og informasjon om kommunen. Men ikkje ein gong ein stad å plassere denne turistinformasjonen har ein klart å finne fram til.

Vi som kjenner denne regionen veit kva den har å by på. Det er synd at det skal vere så vanskeleg å få til eit samarbeid som alle tre kommunane kan få nytte av, og som kan vere ei drahjelp for dei som satsar. Men skal ein ha håp om at turistnæringa skal vekse, må folk få vite om kva vi har å by på.

No har Øygarden gått ut på eiga hand, og resultatet viser at det hjelper å vise seg fram. Gina Nævdal ved Bergen turistinformasjon kan fortelje at folk som er interessert i aktiv ferie, blir fanga av den flotte plakaten i monteren. 

Kultursjefen i Øygarden er optimistisk når det gjeld framtida. Bernt Hjørnevik trur dei berre har sett starten og at turisme blir ei viktig inntektskjelde. Dersom det skjer, kan Fjell og Sund ta lærdom av det som skjer i kommunen lengst nord i regionen.