Den store ringvegen

Det betyr at gamle draumar som å bygge tunnel frå Arna til sentrum, må skrinleggjast for alltid. Fleire store tilførselsvegar gjennom sentrum toler byen ikkje. Det er også galskap med tanke på at mykje av trafikken er på gjennomreise og eigentleg ikkje har noko i sentrum å gjere.

Eit veksande kraftsenter som regionen Askøy, Sotra og Øygarden, kjem også til å føre til meir trafikk. Mykje av denne trafikken har heller ikkje noko i sentrum å gjere. Men skal regionen få utvikle sitt potensiale, trengst det gode vegar.

Litt overraskande kom det forrige veke positive signal frå Bergens-politikarane om planane for ein tverrsamband frå Kollsnes over Askøy til Nordhordland. Men skal dette bli ein fullverdig ringveg rundt Bergen, bør den ikkje leiast over Litlesotra og Bergen Vest. Den bør knyttast til eit nytt samband i sør. Kanskje det er på tide å hente fram att det forkasta alternativet over Tellnes?

Heilt sidan prosessen med nytt Sotrasamband starta, har det vore mana til å halda diskusjonane på eit edrueleg nivå. Ein føresetnad for i det heile å få eit sårt tiltrengt nytt Sotrasamband, har vore at partane greier å semjast om eitt alternativ. Statens vegvesen har vist til trafikktellingar og har kome fram til eit tydeleg resultat. Det er mellom Bergen Vest og Litlesotra trafikken er størst, det er her eit nytt samband må kome. Dagens bru har allereie problem med å takle den trafikken som går der i dag og må på eitt eller anna vis styrkast.

Men også vegstyresmaktene ser at kombinasjonen vekst på Askøy og på Sotra vil vere ei stor utfordring for Bergen. Ein ny prognose viser at det kan bli snakk om 80.000 bilar mellom øyane og Bergen innan 2030.

Sotrabrua må forbetrast raskt. Men ein kan heller ikkje vente for lenge med for alvor å hente fram draumen om den store ringvegen.