Dei små er også viktige

Det er meir sus over kampen for tiger eller kval, enn eit ekkelt, lite insekt eller eit amfibie. Det er heller ikkje lett å få dei store massane til å gå i tog for å redde til dømes planta hjortetunge. Folk flest har aldri høyrt om den, og sidan den berre er ei lita, grøn plante, legg folk heller ikkje  merke til den. Denne planta har Øygarden kommune fått eit spesielt ansvar for å ta vare på. Men det er det truleg berre spesielt interesserte som veit.

Vårt moderne liv er ein påkjenning for naturen. Det er vi etterkvart blitt grundig klar over. Vegar, bruer, kraftlinjer, oljeplattformer, vindmøller har store inverknader først og fremst på nærmiljøet, men desse verknadene sprer seg gjerne vidare og kan få omfang ingen tenkte på.

At planter og dyr døyr ut, er ikkje noko nytt. Det har skjedd sidan tida starta, og det er ikkje stort vi verken treng eller kan gjere med det.  Men tapet av naturmangfald skjer 100 til 1000 gonger raskare enn for 50 år sidan. Det gir grunn til bekymring.

Hobbybotantikar Stig Guntveit i Øygarden ønskjer seg ei frivillig gruppe som kan trå til når område av lokal eller nasjonal betydning blir trua. I 2003 sende dåverande miljøvernminister Erik Solheim eit postkort til alle ordførarane i landet og gav dei ansvaret for å ta vare på kvar si trua plante. Skal ein vekkje folks interesse for dette, må kommunane bli flinkare til å informere og setje fokus på saka.