Dårleg på likestilling

Vi har høyrt det frå mange hald frå innflyttarar: dei reagerer på at gamle kjønnsroller vert haldne i hevd i større grad her enn andre stader. At kvinnene verkar å godta, ja til og med ønske, deltidsstillingar. Heimen og barna har kome i første rekke, og dette er eit ansvar dei ikkje krev at mannen skal dele med dei. Og at strilamenn er veldig på vakt mot å ta på seg det dei meiner er feminine oppgåver. 

Det er påfallande få kvinner som tør å stikke hovudet fram til dømes i det politiske liv. Og dei få som tør det, strevar hardt med å forsvare sine posisjonar. No er situasjonen den at vi har mannlege ordførarar, vararordførarar og rådmenn i alle tre kommunane. Det har funnest kvinnelege varaordførarar, men dei har ikkje halde ut lenge, og dei har ikkje greidd eller vilja fekte seg vidare til ordførarstolen.

No har Øygarden fått det svart på kvitt at dei er dårlege på likestilling. Det står ikkje så mykje betre til i Sund, medan Fjell har greidd å krabbe seg opp til middels høg grad av likestilling. Aud Karin Oen (SV) meiner at haldninga til kvinner er ei av årsakene til den dårlege plasseringa på likestillingsstatistikken. Ho peikar på at det både i offentleg og privat sektor blir jobba mykje ufrivillig deltid blant kvinner.

Å arbeide for å fremje likestilling er ingen enkel sak. Både årsaker og verknadar er så komplekse at det er vanskeleg å plukke ut satsingsfelt. Fjell kommune har til dømes i årevis hatt ein likestillingspris,  men det har bydd på store problem å finne verdige vinnarar.

Eitt område peikar seg likevel ut, det er på tide å rydde opp i den omfattande bruken av deltid, særleg i pleie- og omsorgsyrke. Men her er ikkje kommunane vest om Sotrabrua dei einaste som har svin på skogen.