Bybane til Sotra

Å få bybanen til regionsentra rundt Bergen, vil vera eit godt tiltak for å få folk til å setja frå seg bilen. Men på kort sikt skapar bybaneplanane også utfordringar for det nye Sotrasambandet.

Bybanen er flaggskipet i kollektivsatsinga til Bergen kommune og Hordaland fylkeskommune. Alt tyder på at den vil gje effektiv og miljøvenleg transport til og frå Bergen sentrum, og skapa ein ny giv for kollektivtransport i bergensområdet. Men skal Bybanen verkeleg bli ein suksess, må ein snarast råd få på plass skinner også andre stader enn berre mellom Bergen sentrum og Nesttun. Å strekkja bana utover mot Åsane er ein naturleg stad å starta. Fyllingsdalen og Flesland bør og vera høgaktuelle.

Etter det må ein sjå mot regionsentera i omegnskommunane. Og då er det Straume som kanskje peikar seg ut som det mest aktuelle, på grunn av geografi og befolkingstettleik. På sikt bør ein sjå om det er mogeleg med bybane også til Askøy, Nordhordland og eventuelt sørover mot Os. Berre då vil ein få eit bybanesystem som kan betjena ein stor del av trafikken som elles ville ha skapt kø og forureining.

Ei slik utbygging blir mildt sagt dyr, men det er eit kraftig moment i bybanen no. Difor er det på ingen måte utenkjeleg at me om eit tiår eller litt meir får bybanevogner til Straume. Men køproblema mellom Sotra og Bergen er så store at ein er nøydd til å løysa dei lenge før Bybanen eventuelt kjem.

Om ein skal leggja bybane på den noverande Sotrabrua, krev det vesentlege forsterkingar av den no så nedslitne brua. Det kan difor vera at ein heller kan la bybanen gå over den nye, firefelts brua som venteleg kjem. Spørsmålet er kor ein skal leggja skinnene på vest- og austsida av brua. Her kan ein koma i ein situasjon der bybanen tek dei planlagte kollektivfelta. Og dersom bussane må vika, er ein nøydd til å ha svært hyppige avganger med bybanen for å kompensera for dette. Dessutan vil det krevjast omfattande planlegging og reguleringsarbeid for å få på plass eit bybanesystem mot Sotra. Og ein må i alle høve ikkje skikka seg slik at dette arbeidet forseinkar det nye Sotrasambandet ytterlegare.