Brennpunkt Storavatnet

Det nye fastlandssambandet mellom Fjell og Bergen var i ferd med å enda i ein debatt som berre handla om løysingar i Bergen vest. 2011 skulle visa at rådmannen i Fjell langt på veg fekk rett i sine dystre spådommar. Første delen av året gjekk for vegvesenet med til å gjera ferdig det nye planprogrammet for sambandet. Nytt planprogram måtte til fordi bystyret i Bergen vedtok at planområdet for sambandet måtte utvidast frå Storavatnet til Liavatnet. Politikarane i Bergen tok over initativet i prosessen, etter det dei hadde opplevd som eit felles løp frå vegvesenet og Fjell kommune for ny bru i sambandet. Ønske om tunnel under sundet i dagens trasé gjekk tapt for Bergen, då samferdselsministeren peika på bruløysing.

Likevel, eller kanskje nettopp av den grunn, greidde bypolitikarane å riva til seg initiativet i saka. I Bergen tok dei seg god tid før byrådet nokre dagar før det kima i juleklokker, fann tida inne til å vedta planprogrammet. I vedtaket er det ikkje berre planane heilt fram til Liavatnet som skal vera på plass, før Bergen vil sleppa nye felt med trafikk frå vest fram til Storavatnet. Byrådet krev eigen busstrasé mellom Storavatnet og Liavatnet. Politikarane i Bergen stolar ikkje på fagre vyer frå vegvesenet om bybane heilt vest til Storavatnet. Bergen seier på den eine sida at dei godtek prinsippet om å dela sambandet i to kommunedelplanar, der krysset på Storavatnet skal høyra til delplan 1 vestover mot Kolltveit. I same vedtak ber Bergen om felles finansiering for heile strekninga frå Kolltveit til Liavatnet.

Bypolitikarane vil ha finansieringa klar også for del 2 av sambandet, Storavatnet-Liavatnet. Filip Rygg (KrF) og resten av byrådet er klinkande klare på at det ikkje er noko poeng i eit nytt samband, viss det berre flyttar køproppen frå strekninga Bildøy-Sotrabrua og inn på Storavatnet. Alle som pendlar mellom Sotra og Bergen, veit at Storavatnet allereie er ein propp vestover. Særleg på ettermiddag, men også på morgonen.

Filip Rygg har eit poeng når han peikar på at også region vest treng ei vestre innfartsåre som fungerer. Byrådet krev at kollektivtransporten vert styrka framfor personbilen mellom Sotra og Bergen sentrum. Det same har byråkratar og politikarar i kommunar og fylke og stat snakka om i eit halvt tiår. Køane står på same stader som før, det einaste som skjer, er at dei veks.

Dermed vert vegvesenet og Fjell kommune svar skuldig når Bergen stiller krav. Regionen sitt krav om betre vegar også på Storesotra har hamna i bakleksa. Der blir dei så lenge kollektivfelt,  pendlarparkering og kryssløysingar ligg i reguleringskø og motsegnsdvale.