Vekkjer til live konserttradisjon med Vamp

Det er mange år sidan nedlagte Marsteinen Fjordhotell arrangerte sin siste konsert i Austefjorden i Sund. No vekkjer det nye hotellet opp att tradisjonen.

– Vamp held sin einaste konsert i Hordaland denne sommaren her på hotellet, seier sals- og marknadsansvarleg Ole Martin Opitz ved Panorama konferansehotell.

Har følgt vêrmeldingane

Om lag halvparten av dei 900 billettane, alle sitjeplassar, var selt ved oppteljinga i starten av denne veka.

– Sidan det er ein utekonsert, reknar vi med at mange ventar med å kjøpa billett til dei er trygge på at vêret blir bra, seier Opitz. Han har sjølv vore spent på vêrmeldingane den siste tida.

– No ser det heldigvis ut til å bli høgtrykk og fint vêr. Blir det regn, må vi satsa på regnponchoar, smiler han.

Vamp skal spela med ryggen mot Austefjorden på den store plassen like utanfor restauranten til hotellet, slik at publikum får havutsikt.

Alt klokka fire om ettermiddagen opnar buffeten inne i restauranten.

– Både buffet og overnatting er utselt, seier Opitz.

Vidarefører tradisjon

Inngangen til konserten blir frå sørsida av hotellet. Under tak langs veggen inn mot den store konferansesalen, vil det bli selt grillmat, fiskesuppe og drikke.

– Konserten startar klokka sju, men folk må gjerne koma tidlegare og få seg noko mat, oppmodar Opitz. Porten til konsertområdet opnar i fire-tida.

– Alt no har vi selt såpass at vi ikkje går i minus. Dersom også gjennomføringa blir ein suksess, vil vi satsa på fleire konsertar framover, seier Opitz. Han fortel at sundsokningane og andre har gitt positive tilbakemeldingar på arrangementet.

– Det gamle hotellet arrangerte konsertar, og folk er glade for at det skjer noko. Dette blir spennande, smiler marknadssjefen.

Aktuell med plate

Vamp går ei travel reisehelg i møte. I kveld spelar dei i Vadsø, i morgon altså i Sund, og på laurdag spelar dei på Jæren.

Med seg til Austefjorden har dei færøiske Eivór Pálsdóttir, som deltok som gjeste-vokalist på albumet «I full symfoni II» som kom ut i 2010. I haust lanserer bandet ny plate, og konserten i morgon kveld vil by på både gamle Vamp-klassikarar og smakebitar frå den nye plata.

– Vamp spelar i 90 minutt, fram til halv ni. Då inviterer vi folk til å ta resten av kvelden med DJ i partyteltet vi har fått på plass i storsalen, seier Ole Martin Opitz.