Syngjande fjortiskamp

STRAUME: – Det er eit litt amerikansk-inspirert stykke, etter at eg var i New York i haust, fortel teatersjef Beate Antonesen.

DoReMi Teater har markert seg med fleire solide oppsetjingar sidan starten i 2005. Laurdag er det premiere på «To som oss», der handlinga krinsar rundt to rivaliserande jentegjengar.

– Ungdomane i teateret hadde veldig lyst på eit moderne stykke, og då fann eg ut at eg kunne skriva om dagens fjortisar og dei utfordringane dei har, seier ho.

Gjengkamp
Dei to gjengane konkurrerer om makta på skulen, og om sigeren i den årlege dansetevlinga.

– I år er det færre som har store roller med solosang og mange replikkar, mellom anna av reint praktiske årsaker.

Med færre hovudroller kan DoReMi ha fleire reservar om det skulle bli fråfall. Dessutan blir det enklare å få til god lyd når det ikkje er altfor mange som spring rundt med mikrofon på scena.

Sjølvskrive
– No er lyden knallbra. Me hadde generalprøve på måndag, og det vart veldig bra, seier Antonesen, som har med seg sambuaren Erik Bøe på lyd og lys.

Ho har sjølv skrive manus til dei fleste stykka DoReMi har spelt. Nokre av stykka har vore moderniserte versjonar av gamle eventyr, andre har vore eigne idear heilt frå grunnen av. No er det altså «To som oss» som gjeld, og det blir fire framsyningar i kultursalen ved Fjell rådhus i helga. DoReMi har tradisjonar for to teaterstykker kvart år, og til jul vert dei igjen å finna på scena.