Syng om livet på øyane

HJELME: Det er mykje historie i tekstane til Johan Toska.

– Eg skriv om daglegdagse ting på landet, og så mimrer eg litt, seier Toska. Strilecountryartisten skriv frå der han bur.

– Eg er en mann i 60-årsalderen og eg skriv ifrå min ståstad. Inspirasjonen er livet på øyane i vest no og før i tida, fortel han.

Medaas og Kleppevik
Sjangermessig plasserer han sjølv musikken sin ein stad mellom Ivar Medaas og Johannes Kleppevik.

– Eg skriv på norsk, og på dialekt, for det tykkjer eg er viktig. Det å finne min egen sjanger og ikkje etterlikna alle andre betyr mykje, seier han.

Musikken ber preg av country, men som spor 13 har Toska skrive ein vals som handlar om sommar på landet. Nokre av songane til andreskiva «Øyane i vest» var ferdige allereie da han gav ut sin første cd i 2008. Songen med tittelen «Øyane i vest» fekk speletid på Radio Sotra tidlegare i år.

Studio i løa
Løa på bustaden i Hjelme i Øygarden har han innreia til studio. Her skriv han tekstar og melodiar når kreativiteten kriblar. I Løa skriv han jamnt og trutt, spesielt om hausten og vinteren.

Innspelinga skjer óg i løa. Toska legg sjølv til gitar, steelgitar, trekkspel, bass og munnspel, og kanskje noko banjo om det passar. For å finpussa på verka, ringer han musiker Harald Dyb, som legg på fleire instrument og klangset musikken. Toska har tidlegare spelt på Hellesøydagen, på fiskefestivalen på Nautnes og på Kystsogedagane, så nokre konsertar blir det nok utover øyane i sommar óg. Johan Toska sleppte sin andre cd, «Øyane i vest», på Rong Senter 19. juni.